MUSICO-P. 1

Le Corou de Berre es un group nissard. Si poulifounìo soun claro coume l'aigo d'uno sourço, aériennes coume un cant d'aucèu dins la primo. Tóuti li cansoun de A Cura di Michel Bianco n'en soun un testimòni. D'ùni qu'aguèron la chanço de les descurbi au Coungrès de la Santo-Estello de Niço fuguèron séduits, d'autant que li voues s'endevènon coume li det de la man. Vaqui un tros dóu disque que soun titre es "Garibaldi".

Lei Gabian, Tambourinaire deis Aup, an rendu un óumage emé aquéu disque sarra que soun titre es Mirèio Sèmpre. De dela de la jouinesso eternalo de la calignairis de Vincèn, d'aquelo frescour encantarello qu'a panca entamena lou noste plesi, sus aqueste coulas s'enfiln de perlo irisado, quouro countado, quouro cantado à plusiour voues, quouro jougado, mai sèmpre enjougado. Nòsti gramaci van à Michèu Benedetto que nous faguè couneisse aquelo obro que sourgènto de la pensado mistralenco. Bono escouto ! Osco e longo-mai lei Gabian !

Coume l'escriguè l'inóublidable e troublant Jan Boudou : « Es sus la talvèra qu'es la libertat ! » Emé Solelh Solelhaire, la Talvera nous remembron dous vers ufanous : "O Solelh solelhaire vèni calfar la pèl / E lo còr del poèta qu'a ni saile ni mantel". Un soulèu ensouleia, es uno evidènci ; uno autro n'es d'escouta aquéu disque sarra sènso jamai se n'en lassa, en se leissant breça vo en se fasènt bacela emé de meloudìo tras-que poulideto. Asseuramen, aquéu group d'aqui, se n'en parlara encaro long tèms. Dins lou tros proupausa, mai de dos minuto soun counsacrado à "Vòli cap mourir", mentre que lou demai dóu tèms l'es à "Lo testament del pòrc". Bono balado sus si balado...

Avèn pas óublida sa participacioun à la Court d'Amour de la Santo-Estello cantaleso de la Roque-Brou. Escapado ié represèntavo Prouvènço e fuguessian tóuti emballés estènt que tournèron enventa lou balèti ! En testimòni de soun art (soun un fube sus lou pountin), dous tros dóu disque sarra que soun titre es En balèti : uno valso irlandeso sus un èr tradiciounau emé "Stars on the country down", pièi un ciéucle circassan emé "Greensleeves". De-segur, se pòu dire qu'acò souno anglés, mai un cop fai pas p... e se vostro esquino presènto pas uno envejo sensiblo e inmestrejablo de boulega, fau ana vèire lou mege, un lumbago vous guette. Soulide !...